Aran assistic a aguesta hèira de referéncia a nivèu mondiau, celebrada aguesti dies en Madrid.

Eth conselhèr de Torisme, Promocion Economica, Comèrç e Mobilitat deth Conselh Generau d'Aran, Josep Canut, e tecnics der airau de Torisme deth Conselh Generau d'Aran participèren ena sua 46au edicion.

FITUR, que se celebrèc enguan entre es dies 21 e 25 de gèr, ei un eveniment de referéncia internacionau deth sector toristic, capdavantèr entàs mercats receptius e emissors a nivèu mondiau, damb un totau de 161 païsi participaires e dètz mil empreses representades.

Tath conselhèr Canut "FITUR ei ua veirina tà dar a conéisher era Val d'Aran coma destinacion pera sua aufèrta toristica, que hèn d'Aran un territòri de referéncia". Canut a remercat tanben "era importància qu’en mes de mai d'enguan era Val d'Aran acuelhe era Elevate Adventure, Travel, Trade Asociation (ATTA), principau associacion deth sector deth torisme d'aventura e natura. Ua conferéncia qu'amasse a professionaus deth torisme a nivèu internacionau.

Es objectius mercats pera Val d'Aran en aguesta edicion de FITUR son:

- Era promocion dera mèrca Val d'Aran.

-  Networking damb d’autes mèrques toristiques e mieis de comunicacion.

- Trebalhar damb empreses tecnologiques tà èster ath dia en innovacion e Intelligéncia Artificiau, a on era hèira ei cada viatge mès ua plataforma de referéncia.


HÒNT: CONSELH GENERAU D'ARAN