Dempús de lèu dus ans dera metuda en marcha deth casau on-line ena Val d’Aran, un grop de hemnes usatgères abituaus se trobèc presencialament damb era equipa de dinamizadores en Espaci Familhes de Vielha.

Pendent era session se hec un aperitiu e ua session damb era tecnologia de realitat immersiva e se reflexionèc sus eth programa e er impacte que les supause en çò que hè ar acompanhament, es rotines e es dinamiques d’estimulacion.

Es participaires, majoritàriament hemnes d’edat fòrça auançada, manifestèren es dificultats entà contunhar en tot participar enes espacis comunitaris (coma es casaus de jubilats) e per açò arregraïren era iniciatiua en tot prepausar naues amassades presenciaus.


Eth casau on-line s’inscriu en marc deth programa Ligams en Aran entà combàter era solitud non voluda. Se tracte d’ua iniciatiua deth Conselh Generau d’Aran a trauès des Servicis sociaus.


HÒNT: ARAN SALUT