Eth talhèr de lanteràpia dera Residéncia Sant Antòni de Vielha ei fòrça mès qu’ua activitat manuau; ei un espaci de connexion, creativitat e, sustot, de solidaritat. Aguesta iniciatiua nèish damb era intencion de collaborar damb era Associacion Hemnes de Les, qui actue coma pònt solidari damb diuèrses ONGs.

Eth dia 1 d’abriu viuérem ua jornada fòrça emotiua. Alba Boya, presidenta dera Associacion Hemnes de Les, mos visitèc damb es responsables deth projècte “Abriga’t”.


Aguesta entitat, damb qui collaboram des deth talhèr de lanteràpia, volec desplaçar-se enquiara nòsta residéncia damb uns objectius fòrça clari: conéisher cara a cara as nòstes residentes, es vertadères “tricotaires” que dediquen eth sòn temps e esfòrç a téisher (chapèus, bufandes, michons, còthi,...) e, d’aute biais, explicar detalhadaments eth projècte e mostrar, damb imatges e testimònis, eth destin finau de cada pèça confeccionada damb tant de suenh.


Siguec ua experiéncia fòrça enriquidora e positiva. Vederen qu’eth sòn trabalh a un sens dirècte ena vida d’autes persones, e açò ei era milhora motivacion possibla. Saber que cada punt ajude a “abrigar” quauquarrés qu’ac a de besonh, aumplís d’orgulh e satisfaccion as nòstes granes collaboradores.


Volem seguir damb aguest lèma “Era Lanteràpia ei eth hiu que mos manten junhudes. Contunharam teishent e seguiram ajudant”!


HÒNT: ARAN SALUT