Política
Eth Conselh Generau informe qu'era residéncia de Sant Joan de Les aurie de daurir en prumèr semestre de 2026
Cau rebrembar qu'eth projècte s'impulsèc en 2017 damb eth govèrn de Convergéncia Aranesa, mès, segontes Unitat d'Aran, presentaue fòrça mancances e non compdaue damb un assessorament especific entà aguesta matèria
Eth Conselh Generau d’Aran a anonciat qu'era Residéncia de gent grana Sant Joan de Les daurirà en ua prumèra fasa pendent eth prumèr semèstre der an 2026.
Rebrembam qu'aguest equipament siguec impulsat per anterior govèrn de Convergéncia Aranesa eth 6 de noveme der an 2017 mès, des der actuau d’Unitat d’Aran, qu’entrèc en 2019, destaquèren des deth prumèr moment qu'es òbres non èren ben executades, que i auie grani problèmes logistics e que non se poderien complir aqueri tèrmes pr'amor qu'eth projècte non ère ben plantejat.
9 ans mès tard, tot hè a indicar que, damb un nau sistèma, poderà daurir-se en ua prumèra fasa pendent aguesti prumèri sies mesi de 2026.
Er anterior projècte compdaue damb 65 places, ua chifra que considère sobredimensionada era Sindica d’Aran, Maria Vergés, pr’amor qu’actuauments, non s’apròpe ad aqueth numèro es vesins que se tròben en listat de demora entara residéncia Sant Antoni de Vielha.
