Er Ajuntament de Vielha e Mijaran recep era autorizacion per part dera Confederación Hidrográfica del Ebro entà desvolopar milhores en lhèt der arriu Garona ath sòn pas per Vielha e Betren dempús de 3 ans de demanes e amassades entre andues administracions entà desencalhar aguesta problematica mediambientau.

Es actuacions previstes comprenen trams urbans e interurbans d’ua longada de 2.957 mètres e ua superfícia totau de 5.294,84 m² en zònes afectades per inundacions.

 Es trabalhs consistiràn ena retirada de rominguères invasiues qu’aucupen eth laterau der arriu, era neteja des marges e des pònts tà evitar acantieraments vegetaus, e era retirada d’arbes mòrti de granes dimensions.

 “Arregraïm ara CHE qu’age escotat es demanes que ja hè fòrça temps que li auem transmetut sus era importància de milhorar er estat de conservacion deth lhèt der arriu Garona en Vielha e Betren. Eth nòste municipi afronte actuauments ua acumulacion excessiva de vegetacion en aguest arriu, çò que represente un risc important entara seguretat des nòsti vesins. Quan era vegetacion creish sense contraròtle, pòt tapoar eth pas dera aigua e aumentar considerablaments eth perilh d’inundacions, especiuaments en epòques de ploges intenses. Era prevencion ei fonamentau. Actuar ara signifique evitar damatges majors en abitatges, infrastructures e terrens agricòles en futur”, soslinhe eth baile de Vielha e Mijaran, Juan Antonio Serrano.


HÒNT: AJUNTAMENT DE VIELHA E MIJARAN