Eth plen deth Parlament de Catalunya a aprovat aué era proposicion de lei sus eth reconeishement dera singularitat d’Aran presentada pes grops politics deth PSC-Units per Avançar, Junts per Catalunya, ERC, CUP e Comuns a prepausa deth Conselh Generau.

Eth govèrn d’Aran a trabalhat pendent mès d’un an entà arténher aguest pas istoric qu’assegure eth reconeishement explicit e practic a nivèu juridic e administratiu dera maxima institucion aranesa, a despiet de compdar damb mès de trenta ans d’autogovèrn, e refortilhe eth besonh de non aplicar de forma automatica e indiferenciada era normativa de regim locau en tot garantir un reconeishement explicit der autogovèrn aranés.

Era sindica d’Aran a profitat tà anonciar qu’er acòrd de finançament entre eth Conselh Generau e era Generalitat ei fòrça perfilat, e qu’era cifra finau serà propèra as 43 milions d’euros, damb un increment de mès de 4 milions respècte deth finançament actuau , ara demora d’acordar es qüestions sus era participacion enes tributs dera Generalitat. N’aguest sens, era sindica a hèt ua crida ara responsabilitat des grops politics catalans entà qu’apròven es pressupòsti d’enguan, des que tanben ne depenen es d’Aran e era garantia de servicis en país.

Era sindica d’Aran, acompanhada des vicesindics deth Conselh Generau d’Aran e dera cap dera oposicion, an assistit ath debat e posteriora votacion ena Cramba catalana.

Mès informacion:https://short.do/0HJG_


HÒNT: CONSELH GENERAU D'ARAN