A arrincat era 18ª edicion dera Audi quattro Cup ena estacion d'esquí aranesa de Baqueira Beret damb eth Trofèu Amics de Montgarri e damb ua grana participacion qu'a superat es 250 esportistes entre es categories U10 e U12.

Eth calendari entad aguesta sason 2025/2026 includís sies cites qu'auràn lòc entre es mesi de gèr e abriu, enes diuèrses estacions d'esquí deth panorama nacionau. Audi Espanha e era RFEDI seguissen en tot collaborar ena sua apòsta peth futur gràciesad aguest espectacular circuit, en qu’era base a tot eth protagonisme.

I auie previstes dues competicions, ua en dissabte 10 de gèr e ua auta entath 11 de gèr, totun, pr’amor des granes nheuades queigudes pendent eth dissabte, s’auec de suspéner era pròva. A despiet d’açò, pendent eth dimenge, se poguec disputar era pròva en ues condicions excepcionaus damb corredors vengudi de tot er Estat Espanhòl. Era pròva, que siguec organizada peth Club Aranés d’Espòrts d’Iuèrn, consistie en un gigant a ua manja entara categoria d’U10, autant tà mainatges coma mainades, e de dues manges en cas de U12.

Es guanhadors sigueren en U10 era aragonesa Irene Sopesens e eth madrilenh Nicolás Pérez e en U12 Gina Cruz e Xavi Tarraga.

Eth circuit seguirà en dues setmanes e se desplaçarà entà Castelhà e Leon, concretament en San Isidro eth dissabte 24 de gèr.