Succès dera tresau edicion dera Infinite Race Val d'Aran
Damb mès de 160 participaires e a on James Archer siguec era persona que mès torns dèc en recorrut damb mès de 220 km e lèu 6.000 mètres de desnivèu positiu.
Naut Aran a esdevengut referent nacionau enes pròves de BackYard Ultra pendent aguest fin de setmana damb era celebracion dera 3au edicion dera Infinite Race Val d’Aran: ua pròva que consistís en dar eth maximom numerò de torns a un circuit de 6.7 km e mès de 200 mètres de desnivèu positiu.
Era pròva auie un recorrut que passaue pes poblacions de Salardú, Unha e Gessa, en tot connectar-se en parts mejançant eth Camin Reiau.
Des mès de 160 corredors e corredores que prenèren era gessuda, cada ora que passaue s’anauen retirant corredors. Era net arribèc e mès d’ua vintea seguien de pè, mès es emocions fòrtes se demorauen en maitin següent.
A compdar des 09 deth maitin sonque demorauen dus corredors, Xoan Falcó, corredor locau, e James Archer, que venguie de dehòra a emportar-se era victòria. Dempús de 33 torns que resultauen en 221 quilomètres e lèu 7.000 mètres de desnivèu positiu, er aunor d’èster guanhador siguec entà James en ua autentica batalha de fòrça mentau e fisica.
Ena categoria femenina, ena milhor aranesa siguec Ruth Barrera que sonque siguec superada per ua competidora francesa, Severin Duhalde.
Era organizacion d’aguest eveniment ja pense ena quatau edicion en tot deishar ues molt bones sensacions a nivèu de participacion.
