Iniciam naues accions entà melhorar era seguretat e era accessibilitat en Bossòst

Aguesti dies an començat es òbres deth projècte de melhora dera seguretat viària e dera accessibilitat universau ath long dera trauèssa dera N-230 ath sòn pas per Bossòst, ua accion especiuaments importanta en ua via que concentre diàriament trafic, pedanhs e bona part dera activitat comerciau deth nòste municipi.


Es prumèrs trabalhs ja son visibles en diuèrsi punts e se centren, entre d'autes accions, en apariament e adeqüacion de trepadères e paviments, atau coma ena eliminacion de barrères entà hèr es nòsti recorruts pedanhèrs mès segurs e accessibles. Eth projècte contemple tanben era creacion de petites rampes adaptades damb "paviment podòtactil".


Mès era accion va fòrça mès enlà: includís melhores enes passi de pedanhs e era sua iluminacion, senhalizacion, parcatges, reprogramacion e melhora deth horcadís semaforic, installacion de radars pedagogics e autes mesures destinades a redusir era velocitat e aumentar era seguretat des pedanhs e conductors.


Se tracte d'ua inversion globau de 138.946,57 €, d'accions restacades ara mobilitat segura, sostenible e intelligenta, ara pacificacion deth trafic e ara reduccion dera accidentalitat urbana.


Pendent es pròplèus setmanes es òbres auançaràn per desparièrs punts deth municipi. Èm conscienti que pòden ocasionar molèsties puntuaus e arregraïm per auança era comprenença e collaboracion de vesins, comerçants e visitants.

Contunham trabalhant per un Bossòst mès segur, accessible e amable entà toti.


HÒNT: AJUNTAMENT DE BOSSÒST