Eth Conselh Generau d’Aran a destinat enguan ua subvencion de 6.000 €, autrejada per IDAPA (Institut entath Desvolopament deth Naut Pirenèu e Aran), entara elaboracion de materiau promocionau entà fomentar era mobilitat lenta e era circulacion pes camins dera Val d’Aran

Era accion s’includís enes politiques de promocion d’ua mobilitat sostenibla e respectuosa damb eth territòri, e a consistit ena produccion de diferenti materiaus entara difusion e visibilizacion des itineraris e activitats restacades damb era mobilitat lenta.

Concrètaments, era subvencion a permetut finançar era produccion de morralets tecnics damb era mèrca Val d’Aran, pòlos damb era imatge d’ÒcBike e bidons corporatius, que s’utilizaràn en accions promocionaus e eveniments restacadi damb eth senderisme e era mobilitat non motorizada.


Damb aguesta inversion, eth Conselh Generau d’Aran refortís eth sòn compromís damb era promocion d’un modèl de mobilitat mès sostenible, alinhat damb era estratègia der IDAPA entà méter en valor eth hilat de camins de montanha.


HÒNT: CONSELH GENERAU D'ARAN