Er espòrt catalan se vestís de gala ena 29 edicion dera Fèsta de l'Esport, que se celebrèc ager en Barcelona

Eth Conselh Generau d’Aran siguec representat peth conselhèr d’Espòrts, Javier Cavero, e pera coordinadora der airau, Raquel Benavides.

Era Festa de l’Esport Català tornèc a demostrar que Catalonha ei sinònim de talent, esfòrç, constància e umilitat. Ua net magica en l’Auditori deth CaixaFòrum, a on se hec aumenatge a esportistes que inspíren, laguens e dehòra deth territòri, non sonque a nivèu esportiu senon tanben a nivèu uman .

Eth conselhèr d’Espòrts deth Conselh Generau d’Aran remerquèc “eth bon trabalh que pòrten a tèrme es esportistes aranesi d’eleit enes desparières modalitats esportives” e afirmèc eth sòn desir que, en un futur immediat “arribe eth reconeishement de quinsevolh des nòsti talents aranesi, e que siguen protagonistes d’ua d’aguestes gales de referéncia ligades ath mon der espòrt”.

Er atlèta Kilian Jornet e era nadadora, Iris Tió, sigueren es grani protagonistes d’ua gala plea d’emocion, suspreses e moments inoblidables, a on tanben se reconeishec a joeni damb grana projeccion e a referents der espòrt catalan, com ath portèr deth FCB Joan Garcia, e ara joena escaladora Geila Macià. Andrea Fuentes coma milhor entrenadora, Felipe Perrone coma legendari 360, Dani Anglada, ar esperit esportiu, ath club Vila-sana de hoquei patins o ara gestion federativa de Ramón Nogué, president dera Federació Catalana de Golf.

Era gala compdèc damb mès de 400 convidats.


HÒNT: CONSELH GENERAU D'ARAN