Agustí Roc e Arce Feixas guanhadors dera 8au Vertical Aran

Agustí Roc e Arce Feixas se proclamèren, aguesta passada dimenjada, guanhadors des categories masculina e femenina dera 8au edicion dera Vertical Aran Vielha-Montcorbison, Memorial Tonet, organizada per Era Pòrta d’Aran. 

Era pròva auec gessuda ena Plaça dera Crotz d'Occitània en Vielha e era Bassa d'Oles, enquiath cim deth Montcorbison a 2.170 mètros, dempús de 1.200 mètros de desnivèu positiu e 4 quilomètres de recorregut.

Era Vertical Aran cònste de tres recorreguts desparièrs: Marcha Populara, Pujada Populara Vertical Aran e Carrèra Vertical Aran, e enguan i participèren lèu un centenat de participaires entre corredors e caminaires.

En categoria masculina es tres prumèrs classificadi sigueren Agustí Roc, seguit per Marc Sabater e Miguel Caballero; mentre qu'ena categoria femenina s'emportèc er aur Arce Feixas, seguida per Ares Izard e Policarpia Choque. 

Era pròva compdèc ath delà damb era participacion de grani referents coma Oscar Carrasco, campion dera Ultra Trail Naut Aran; Francesc Solé, dus còps guanhadors dera Ultra Trail Andòrra; e Iu Escolà, campion dera Mila Vertical d’Àreu 2018, entre d'auti. 

Era Vertical Aran Vielha-Montcorbison, Memorial Tonet, qu'ei era darrèra carrèra de Trail Running dera sason ena Val d’Aran, compdèc damb eth patrocini e era collaboracion deth Conselh Generau d’Aran, er Ajuntament de Vielha e Mijaran e Volentaris Val de Aran.

IMATGES: PEP CASASAYAS