S’a iniciat eth hestau Sons dera Garona ena poblacion de Salardú. Des d’aguest diuendres 7 d’agost e enquiath 9, aguest endret serà er epicentre culturau de tota Occitania damb tota ua sòrta d’activitats entà totes es edats.

Des de visites guidades entara glèisa de Sant Andrèu, en tot passar per mercats tradicionaus, talhèrs de cant e polifonics o es concèrts que s’amiaràn a tèrme a compdar des tardes, harà qu’aguest parçan de Naut Aran sigue tot un referent en aguest encastre.

Artistes dera talha de Joan Francés Tisnèr damb Verd e Blu, Castanha e Vinovèl o Sarabat, recentaments nomentadi Prèmi Lengua Viua per aguesta associacion proaranesista, seràn diuèrsi des grani nòms qu’actuaràn en Salardú ath long d’aguest fin de setmana.

Ues jornades que revitalizen era economia deth municipi e aufrissen ua alternativa mès d’ostiu a vesins e visitaires.

Sons dera Garona pòrte, damb aguesta, quate edicions en tot potenciar era cultura occitana e gascona e apropar-la as vesins e persones que visiten aguesti dies Aran.