Era Val d’Aran a celebrat era sua prumèra actuacion deth cicle culturau Romanic Musicau: aguest eveniment composat per 2 accions que se haràn ath long deth mes d’en agost, an coma objectiu fusionar era musica damb es espacis istorics e culturaus mès importants deth romanic aranés.

En aguest sens, era prumèra s’a hèt ena poblacion de Salardú, concrètaments ena glèisa de Sant Andrèu, a on un gran numerò de persones pogueren gaudir de prumèra man dera explicacion deth Romanic ath Modernisme per part d’ua tecnica deth Hilat de Musèus dera Val d’Aran, entà dempús víuer era experiéncia deth Quartet Immortality. 

Era barreja d’aguestes dues activitats ei çò que hè mès especiau ad aguest eveniment culturau.

Dejà se complissen 27 edicions deth Romanic Musicau ena Val d’Aran, mès aguesta de Salardú non serà era unica experiéncia tà víuer-la en aguest format. Eth 22 d’agost tanben se desvoloparà ua naua visita guidada e ua actuacion ena glèisa de Santa Maria d’Arties.

Aguesta activitat ei totauments gratuïta e ei patrocinada per Ajuntament de Naut Aran.