Deth 7 ath 9 d’agost se celebrarà eth quatau hestau culturau Sons dera Garona  qu’a lòc en Salardú e que prebotge era lengua gascona e occitana autant coma d’autes activitats vinculades ath ruralisme, era literatura o es tradicions.

Aguest eveniment a coma un des sòns objectius eth poder conéisher de prumèra man era cultura de tota era Garona qu’arribe enquia Bordeus dera man d’artistes que parlen eth gascon e er occitan e que non son grops tant mediatics e reconeishuts coma es que d’abituda s’escoten.

Pendent aguesti dies s’haràn visites guidades en Sant Andrèu de Salardú e era tor, talhèrs de percussion, de polifonies, de poesia, presentacions, mercats e tot açò sense descuedar era musica que serà er èish centrau. 

Entre d’auti, actuaràn en Salardú grops de naut nivèu coma Castanha e Vinovèl o Sarabat, recentaments nomentadi Prèmi Lengua Viua.

Sons dera Garona se definís coma un hestau locau de patrimòni aranés-occitan e qu’ei dubèrt a totes es persones que volguen assistir. Eth centre neuralgic serà ena plaça Major de Salardú autant coma ena glèisa, que son dus des punts mès subergessents d’aguest endret.