Era Generalitat de Catalonha a iniciat accions de milhora entà previer mès incidents similars as que succediren eth passat 25 de hereuèr quan ua botassada de pèires talhèc era carretèra C-28 ath sòn pas peth Pòrt dera Bonaigua en sens dera Val d’Aran pendent fòrça dies.

S’està consolidant eth talhús d’aguest parçan deth punt quilometric entre eth 42,5 e eth 43,5.

Er Ajuntament de Naut Aran a informat a trauès deth sòn ban e des hilats sociaus qu’es veïculs que volguen transitar per aguesta via, ac poiràn hèr de forma intermitenta, en tot deishar 15’ menutes entà circular, e 45’ arturadi pes òbres que se hèn ena via.

Ath delà, an confirmat qu’es trabalhs s’alongaràn de deluns a dimenge entà qu’era incidéncia afècte eth menor temps possible as viatgèrs.

Cau rebrembar qu’era afectacion deth mes de hereuèr succedic entàs 21:00 dera net e que queigueren pèires de granes dimensions que collapsauen totaument era carretèra.

Segontes expliquèc en sòn dia eth Centre de Prediccion de Lauègi deth Conselh Generau d’Aran, es granes acumulacions de nhèu hèren qu’es pèires pòc a pòc anèssen perdent era fòrça d’arraïtzament e auesse produsit era queiguda massiva en tot taponar aguesta via.

Afortunadaments, sonque s’aueren de planhar damnatges materiaus pr’amor qu’en aqueth moment non circulaue cap veïcul ne persona pera via.