Er Ajuntament de Vielha e Mijaran amie a tèrme ua naua accion de melhora païsatgistica en entorn de Sant Miquèu, laguens deth trabalh contunhat que desvolòpe entà seguir en tot transformar e en tot melhorar era imatge urbana de Vielha.

Era intervencion incorpòre era plantación de sies Magnòlia grandiflora, amassa damb desparières espècies perennes e viues, atau coma era melhora des zònes verdes, partèrres e jardinères der entorn. Era accion compde damb ua inversion de 32.021,04 èuros, IVA includit, e includís tanben era adeqüacion des sistèmes d’adaigament e era mantenença iniciau dera naua vegetacion.

Era accion de Sant Miquèu reflectís era escomesa der Ajuntament per un nau modèl de jardineria urbana. Un modèl que compren es espacis verdi coma ua part essenciau deth dessenh dera ciutat e que cerque crear entorns que creishen, evolucionen e aporten identitat pròpria en Vielha damb eth pas deth temps.

Eth tinent de baile, Alberto López López, explique que “trabalham entà cambiar pòc a pòc era imatge de Vielha, e açò tanben signifique suenhar fòrça mès com dessenham es nòsti espacis publics. En Sant Miquèu auem creat ua naua composicion païsatgistica damb sies magnolis e desparières espècies perennes e viues, en tot apostar per ua jardineria que creishe, evolucione e guanhe valor damb eth pas deth temps”. López ahig que “volem auançar cap a ua jardineria damb mès personalitat, mès diuersitat e pensada entà créisher damb eth pas des ans, en tot deishar endarrèr pòc a pòc un modèl basat unicaments en plantes de sason. Pr’amor qu’açò va fòrça mès enlà de plantar. Se tracte de pensar com volem que sigue Vielha e seguir en tot trabalhar, carrèr a carrèr, entà artenhé’c”.

Aguesta naua forma de trabalhar permeterà crear espacis verdi damb major personalitat e ua composicion pròpria, en tot adaptar cada intervencion as caracteristiques deth sòn entorn e en tot compréner era jardineria coma ua part mès deth dessenh e dera qualitat der espaci public.

Era accion de Sant Miquèu se some atau ath trabalh contunhat qu’er Ajuntament desvolòpe en desparièrs punts de Vielha laguens era linha “Carrèr a Carrèr”, damb er objectiu de melhorar, suenhar e transformar progressivaments era ciutat.

 HÒNT: AJUNTAMENT DE VIELHA E MIJARAN