Eth Hilat de Diagnostic Biomedicau e entara Imatge (Dibi) a culminat era modernizacion deth laboratòri d’Analisis Cliniques der Espitau Val d’Aran, ua intervencion que permet ampliar er airau de preanalitica, refortir era capacitat operativa e posicionar eth centre coma laboratòri de referéncia entà mètges e pacients.

Era renovacion s’a hèt en madeish espaci entà optimizar-ne era distribucion. Açò a permetut ampliar er airau de preanalitica e relocalizar-i diuèrses equipes, entà facilitar eth trabalh deth personau tecnic, redusir desplaçaments innecessaris e milhorar era eficiéncia deth trabalh diari.

Aguesta accion s’includís en un plan globau deth Laboratòri de Referéncia de Catalonha (LRC), integrat en hilat dibi, que prevé era modernizacion des 14 laboratòris d’analisis cliniques que gestione en diferenti espitaus publics de Catalonha.

Era capacitat operativa s’a vist refortida damb era duplicacion dera equipa d’immunoquimica, un hèt que garantís era continuitat assistenciau en cas de pana, permet mantier es tempsi de responsa e evitar era derivacion de mòstres tà d’auti laboratòris.