Eth pòble de Les a acuelhut era session plenària dera Taula de Camins der Alt Pirenèu e Aran, ua jornada dedicada a compartir experiéncies, reflexionar sus era evolucion deth senderisme e méter en valor eth patrimòni naturau, culturau e istoric deth nòste territòri. 

Era jornada a començat en Les damb era benvenguda der alcalde, Andreu Cortés, amassa damb Josep Canut, Conselhèr deth Conselh Generau d’Aran, e David Vallvé, director der IDAPA. Ara seguida, es assistents an podut visitar era Casa Musèu deth Haro.

Posterioraments, es participants s’an desplaçat enquiara Val de Toran, a on an podut descorbir, a trauès d’un itinerari guidat, eth sòn passat ramadèr e minèr e eth singular nuclèu de bòrdes d’Eth Pradet.

Era trobada tanben a compdat damb ua taula redona sus era evolucion deth senderisme pendent es darrèri 40 ans e damb era session plenària dera Taula de Camins.

Der Ajuntament de Les estant, volem arregrair era organizacion dera jornada e era participacion de toti es assistents, atau coma era oportunitat d’acuélher aguesta trobada, que contribusís a compartir coneishements, preservar eth patrimòni e contunhar trabalhant entà méter en valor es camins e es paisatge deth Pirenèu e d’Aran.


Seguim trabalhant peth nòste territòri e peth sòn futur!