S’an iniciat es gravacions dera 7au temporada dera sèrie de ficcion aranesa, Èm çò qu’èm, eth projècte impulsat peth Conselh Generau amassa damb Lhèida TV e era productora Kionalia entara proteccion, difosion e projeccion dera lengua aranesa.

En aguest sens, en aguesta naua sason i aurà naues localizacions e airaus deth territòri que mostraràn ara audiéncia problematiques e qüestions vinculades damb era lengua e era vida ena Val d’Aran. Es emplaçaments escuelhudi enguan an estat er archiu generau d’Aran, er aula de formacion deth Conselh Generau d’Aran, Era Alquímia, Era Audiovisuau de Vielha autant coma d’auti exteriors.

Rebrembam qu’Èm çò qu’èm, siguec guanhadora deth Prèmi Pica d’Estats de Mejans de Comunicacion Locaus des Tèrres de Lhèida ena sua 32au edicion.

SIA, es sòns ajudants e toti es personatges que compausen aguesta sèrie tornen, ua  sason mès, entà resòlver es dubtes mès comuns der aranés a trauès der umor a compdar de principis d’octobre.