Ath torn de 900 persones pogueren gaudir d’ua naua edicion dera Nocturna de Vielha.

Aguest eveniment esportiu compde damb fòrça atractius diferents respècte a çò que son es pròves esportives dera Val d’Aran era rèsta der an.

En prumèr tèrme, es mainatjonhs an es sues pròpries corses: de 0 a 3 ans, de 4 a 6 ans e de 7 a 12 tanben participen de forma non competitiva en uns circuits adaptadi entà eri. Ath torn des 20 dera tarde, se hè era tradicionau caminada populara ‘Paquita Gracia’, qu’ei era auantsala deth moment centrau dera net que son es corses de 5 e 10 quilomètres pes carrèrs de Vielha en plea net.

En 5 quilomètres, eth trailrunner professionau dera equipa Joma, Ivan Calvó s’emportèc era victòria en categoria masculina per dauant deth joen pilòt aranés de Formula 2 dera equipa Prema, Mari Boya. En categoria femenina, era campiona de Catalonha en pista e tanben aranesa, Lòla Cavero, s’imposèc enes 5 quilomètres femenins. En çò que tanh ara corsa de 10 quilomètres, Nicolas Fernández e Liv Westphal s’imposèren ara rèsta de competidors en ua emocionanta pròva damb un gran ambient pes carrèrs deth cap-lòc aranés.

Aguesta 13 edicion dera Nocturna de Vielha hè a consolidar un eveniment esportiu qu’apròpe a non sonque vesins dera Val d’Aran, mès tanben esportistes de naut nivèu  autant coma visitaires deth territòri que vien a gaudir der espòrt eth fin de setmana.