Eth Plen deth Conselh Generau d’Aran a aprovat ua naua modificacion de credit deth pressupòst entà dotar damb 100.000 euros ara factoria de contenguts en aranés.

Aguest projècte, siguec impulsat de forma susprenenta en mes de noveme der an 2025 en prumèr Congrès Internacionau de Comunicacion, Tecnologia e Lengües Minoritàries ena Val d’Aran. Un espaci a on se conversèc sus aguest prètzhèt e qu’auie coma objectiu saber coma era intelligéncia artificiau podie ajudar ena creacion de contenguts periodistics.

Organizat peth Conselh Generau amassa damb Radio Television Espanhòla e era Universitat Pompeu Fabra, se pogut gaudir de tota ua sòrta de conferéncies e taules redones de nauta qualitat ena que s’an pogut arténher conclusions tanplan destacades coma, per exemple, era intencion de crear aguesta factoria de contenguts audiovisuaus a on, mejançant ua productora, i aurie mès preséncia der aranés, quauquarren que comence a préner forma.

Des deth govèrn d’Aran s’a estenut era man as professionaus des mejans de comunicacion e d’auti mieis en format freelance tà que paguen participar deth projècte.