ACTUALITAT
Eth grop de Pompièrs e Emergéncies reclame era equiparacion a toti es nivèus damb es Bombers dera Generalitat
Jos eth lèma "Pompièrs en luta", demanen ath Conselh e ara Generalitat solucions entà auer un milhor futur entà eri
Eth Comitat d’Enterpresa de Pompièrs Emergéncies reclame ath Conselh Generau d’Aran e ara Generalitat de Catalunya compromisi concrets entà auançar ena equiparacion des condicions laborals dera plantilha.
Es trabalhadors denoncien era manca d’acòrds entre es dues administracions e es dificultats enes negociacions damb era Prefectura deth servici. Entre es sues reivindicacions i a era equiparacion salariau damb eth còs de Pompièrs dera Generalitat, milhores enes permisi, vacances e jornada laborau, atau coma eth reconeishement des especialitats professionaus.
Es demanes compden damb eth supòrt deth 90,74 % dera plantilla, que n’a autorizat ath Comitat d’Enterpresa a empréner es mesures legaus e sindicaus que considère de besonh. Eth Conselh apunte a que cau hèr ua revision deth convèni e que s’a adiat pr’amor dera crisi sanitària deth coronavirus autant coma problèmes damb era administracion catalana.
Eth collectiu assegure que vò mantier dubèrtes es vies de dialòg, mès exigís compromisi, tèrmes e solucions efectives dempús de hè ans sense auanci.

