Aguest dimenge s’a hèt era tradicionau Corsa d’Aran per sa lengua ena sua 32au edicion per tota era Val d’Aran.

Era corsa d’Aran per sa lengua ei un recorregut per diuèrsi entorns dera Val d’Aran, damb concretament 3 punts de gessuda que son Montgarri, Les e eth Pòrt de Vielha, entà persutar ena defensa e promocion dera lengua aranesa.

Enguan, aguesta edicion dera Corsa a tornat a préner fòrça importància pr’amor que s’an complit 32 ans de reivindicacion sus er usatge, promocion e difosion dera lengua aranesa, que cada dia ei en mès perilh a despiet qu’era informacion e comunicacion en aranés, auance damb eth temps.

Eth prèmi lengua viua a requeigut enguan en grop musicau aranés, SARABAT, pera sua labor e collaboracion pera lengua en tot promòir-la musicauments damb naui e antics tèmes.

Fin finau e coma dejà ei d’abituda, er acte se barrèc damb eth tradicionau concèrt deth grop occitan Nadau, que hèc a gaudir a toti es assistents d’aguest massiu eveniment pera lengua aranesa.