Era Confederacion Idrografica der Èbre (CHE) retire es rèstes deth pònt que se’n portèc en part er aiguat de 2013 ena zòna d’Arròs, plaçades laguens d’ua propietat privada. Aguestes rèstes representauen un perilh de tapoament e un risc d’inondacion en aguest sector deth Garona.

Coma mesura de proteccion, es Agents de Miei Ambient deth Conselh Generau d’Aran an hèt ua pesca electrica ena zòna entà rescatar era fauna fluviau e evitar quinsevolh afectacion pendent es trabalhs de demolicion.

Aguesta intervencion respon ara demana qu’era sindica d’Aran, Maria Vergés, hec ath president dera CHE, a on mostraue era sua preocupacion per estat der arriu Garona en zònes periurbanes, e demanaue actuacions urgentes com aguesta.


HÒNT: CONSELH GENERAU D'ARAN