Era campanha «ACÍ NE DIDEM» artenh ua participacion de mès deth 97% deth sector comerciau e ostalèr dera Val d’Aran

13/11/2026

Eth Conselh Generau d’Aran a presentat es resultats dera campanha «ACÍ NE DIDEM», ua iniciativa destinada a fomentar er usatge e era visibilitat der aranés enes establiments comerciaus e ostalèrs dera Val d’Aran, damb era collaboracion der IDAPA e eth supòrt deth Grèmi d’Ostalaria dera Val d’Aran e Foment Torisme Val d’Aran.

 

Era campanha a distribuït 691 adesius damb 36 mots en aranés, adaptadi a sies categories d’establiments, damb ua ampla participacion en tot eth territòri:

- Baish Aran: 156 establiments.
- Mijaran: 359 establiments.
- Naut Aran: 176 establiments.

Aguesta iniciativa, emmarcada ena mèrca «EN ARANÉS ÒC», a permetut apropar era lengua pròpia d’Aran ara vida quotidiana dera ciutadanetat e des visitants, en tot reforçar-ne era preséncia en comèrç e ostaleria.

Era campanha contunharà damb ua dusau fasa de difusion digitau e audiovisuau, damb reels, carrusèls, istòries e contenguts en collaboracion damb Lleida TV, ath delà d’un servici de traduccions gratuïtes entàs establiments.

Eth Conselh Generau d’Aran, per miei der airau de Politica Lingüistica, reafirme eth sòn compromís damb era promocion e normalizacion der aranés, en tot fomentar-ne er usatge enes espacis publics e ena vida quotidiana dera Val d’Aran.


HÒNT: CONSELH GENERAU D'ARAN 

Manu Moga e Ricard Gómez