ACTUALITAT
Era Brigada de Servicis deth Conselh Generau d’Aran hè trabalhs de melhora e manteniment de pistes, camins e espacis naturaus dera Val d’Aran
Enes pistes de Cauva e Casau, s’an hèt trabalhs de reparacion e adequacion deth paviment, melhora des corbes e trepaders, retirada de branques e adequacion des passi d’aigua. Ena pista de Valarties tanben s’a actuat ena reparacion e canalizacion deth barranc.
En çò que tanh ath drenatge, s’an netejat es varats des pistes de Bossòst tà Arres e de Varradòs, e s’an iniciat es trabalhs enes trams de Pònt d’Arròs tà Arròs e d’Aubèrt tà Vila, entà melhorar era evacuacion des aigües.
Entà reforçar era seguretat des espacis naturaus, s’an apariat baranes, barretes e trauèsses en entorn deth neishement des arrius Garona e Noguera Pallaresa, en Beret e en camin des Uelhs deth Joeu e Guardader dera Aigua. Tanben s’a netejat un tram deth camin ciclable afectat per un esbauç e era queiguda d'arbes, e s’an substituït es elements dera barana deteriorats.
Enes airaus e guardaders, s’an pintat es baranes deth Guardader d’Arres, Betlan e Salient damb prevision de hè’c en d’auti espacis. Ena palanca deth Planhòt s’an installat dues taules naues e s’a reparat era barralha der airau.
Fin finau, tanben s’an hèt trabalhs de desbrossament deth camp de tir, era reparacion d’ua barrèra d’accès e era construccion d’ua solèra de hormigon en sector de Comades, Arramada d'Uishèra.
HÒNT: CONSELH GENERAU D'ARAN

