Er Ajuntament de Bausen (Val d’Aran) a iniciat ua naua etapa ena sua gestion municipau damb era incorporacion de Pau Gómez coma nau administratiu dera plantilha. Se tracte deth prumèr foncionari de carrèra que ocupe aguesta plaça en mès de tretze ans, un hèt que met fin a un long periòde d’inestabilitat e precarietat administrativa que patie eth municipi.

Gómez s’incorporèc formalament er 1 de seteme dempús d’auer superat damb succès eth procès d’oposicions. Damb era sua arribada, er Ajuntament poderà garantir un servici regular d’atencion ath public, que s’aufrirà es dimars e es dijaus, de 9.00 a 15.00 ores. Es sues foncions includiràn era atencion ciutadana, era gestion documentau, eth registre electronic, era tramitacion d’expedients e eth supòrt as tecnics municipaus.

Un camin complèxe de sanejament economic

Era alcaldessa de Bausen, Alidé Sans, a destacat que s’a agut de hèr un «trabalh enòrme e invisible» entà arribar enquiad aciu, pr’amor qu’era inestabilitat ena plaça de secretaria-intervencion auie arribat a paralizar era convocatòria de plens municipaus e es compdes der Ajuntament pendent longui periòdes.

Des der an 2023, eth consistòri s’a dedicat a desglossar e regularizar era situacion deth municipi, sense personau ara sua disposicion.


HÒNT: AJUNTAMENT DE BAUSEN