Eth jutjat de Vielha decretèc deluns preson provisionau sense fiança entà un vesin deth cap-lòc dera Val d’Aran de 31 ans que suposadaments agredic sexualment ua menor d’edat e aurie aufrit sòs a quate adolescents mès entà mantier relacions sexuaus. Er individu siguec arrestat diuendres passat pes Mòssos d’Esquadra, qu’auie iniciat era investigacion aqueth madeish dia. Se da era circonstància qu’er investigat ei eth proprietari d’un establiment de restauracion e eth hereuèr passat ja siguec arrestat per un pressompte delicte contra era libertat sexuau d’ua hemna.

Es Mòssos d’Esquadra dauriren ua investigacion diuendres passat en tot auer coneishença d’uns presomptius abusi a ua menor d’edat. Es agents contactèren damb era victima, qu’expliquèc qu’er agressor auie un establiment de restauracion en cap-lòc aranés tipe kebab e es hèts aurien succedit en madeish locau. Ath delà, es agents descorbiren que suposadaments er òme aufrie sòs a cambi de relacions sexuaus a gojates menores d’edat qu’anauen tath sòn establiment. Deluns passèc a disposicion judiciau dauant eth Jutjat d’Instruccion en foncions de guàrdia de Vielha, que decretèc eth sòn ingrès a preson dauant eth risc de reitireracion delictiva e de húger.