Pendent aguesta maitiada s’an produsit fòrtes ventades ena Val d’Aran qu’an derivat en un gran numerò de desperfèctes a nivèu d’infraestructures, damb huecs, queigudes de tets o de d’auti elements coma arbes.

Era fòrça deth vent a arribat a mès de 160km/ora en emplaçaments coma eth cap de Baqueira, un shinhau mens en Lac Redon, mès en lèu toti es parçans dera Val d’Aran aguestes ventades aurien arribat a superar es 100 kilomètres/ora.

Ua situacion qu’a hèt a activar-se ath grop de Pompièrs e Emergéncies tà escandir huecs o precintar espacis. Enes ajuntaments, es brigades municipaus tanben actuen de bon maitin tà reaccionar ad aguesta situacion en tot clausurar emplaçaments coma carrèrs, espacis esportius o d’auti, tà qu’es vesins non agen perilh.

En Les, Vielha e Naut Aran s’an hèt comunicats en tot demanar respectar era situacion meteorologica, mès an explicat qu’es damatges son sonque materiaus per çò qu’ei era milhor noticia d’aguest episòdi.